एचपीभी खोप अभियानका लागि मनिषा कोइराला सद्भावना दूत

स्वास्थ्य तथा जनसंख्या मन्त्रालयले एचपीभी खोप अभियानका लागि अभिनेत्री मनिषा कोइरालालाई सद्भावना दूत नियुक्त गरेको छ ।

सरकारले अभिनेत्री कोइरालालाई राष्ट्रिय खोप कार्यक्रम तथा एचपीभी खोप अभियानका लागि सद्भावना दूत नियुक्त गरेको हो । सोही अवसरमा मन्त्रालयमा आयोजित कार्यक्रममा बोल्दै स्वास्थ्य तथा जनसंख्यामन्त्री प्रदीप पौडेलले एचपीभी खोप देशव्यापी रुपमा अघि बढाउनका लागि यो अभियानको सुरुवात गरिएको बताए ।

उनले नेपालमा १० वर्षदेखि १४ वर्ष उमेर समूहका १६ लाख किशोरीहरूलाई नेपाल सरकार स्वास्थ्य तथा जनसंख्या मन्त्रालयले यो भ्याक्सिन उपलब्ध गराउने बताए।

उनले भ्याक्सिन उपलब्ध गराउने केन्द्रका रुपमा विद्यालयहरूलाई राखेको र ६ कक्षादेखि १० कक्षासम्मका छात्राहरूलाई यो खोप उपलब्ध गराइने जानकारी दिए। खोप लगाउने अवधिभित्र विद्यालयमा नपुगेको खण्डमा वडामा उपलब्ध गराइने बताए।

उनले अभिनेत्री कोइराला यसपछि पनि तीन वर्षसम्म सञ्चालन हुने सबैखाले खोप अभियानहरूमा सद्भावना दूत रहने उनले बताए। मन्त्री पौडेलले नेपाललाई सबै खाले क्यान्सरमुक्त बनाउने अभियान प्रभावकारी बनाउने उद्देश्यअनुसार काम गरिरहेको बताए।

उपचारात्मक क्षेत्रमा मात्र नभइ निरोधात्मक क्षेत्रमा काम गर्न जरुरी रहेको उल्लेख उनले बताए। नेपालीलाई रोगी हुन नदिन सरकारले हरसम्भव प्रयास गरिरहेको मन्त्री पौडेलले बताए।

उनले भने, ‘एचपीभी खोप देशव्यापी रुपमा अघि बढाउनका लागि यो कार्यक्रम सुरु गरिएको हो । नेपालमा १० वर्षदेखि १४ वर्ष उमेर समूहका १६ लाख किशोरीहरूलाई नेपाल सरकार स्वास्थ्य तथा जनसंख्या मन्त्रालयले यो भ्याक्सिन उपलब्ध गराउने छ । हामीले भ्याक्सिन उपलब्ध गराउने केन्द्रका रुपमा विद्यालयहरुलाई राखेका छौँ । ६ कक्षादेखि १० कक्षासम्मका छात्राहरुलाई यो खोप उपलब्ध गराइनेछ । १० देखि १४ वर्ष उमेर समूहका खोप लगाउने अवधिभित्र पुग्नुभएन भने वडामा उपलब्ध गराइनेछ । यसको प्रचारप्रसार जरुरी छ । कोही पनि नछुट्ने स्थिति निर्माण गर्न जरुरी छ ।’

कार्यक्रममा बोल्दै अभिनेत्री मनिषा कोइरालाले यस खोप अभियानमा सहभागी हुन पाउँदा खुशी लागेको बताइन् । उनले यसको महत्वबारे स्पष्ट पार्दै अभियानमा सहभागी हुने बताइन् । सरकारले आउँदो माघ २२ गतेदेखि एचपीभी खोप अभियान सुरु गर्दैछ ।