पेनाल्टीमा भारतलाई हराउँदै फाइनल पुग्यो नेपाल

साफ महिला च्याम्पियनसिप–२०२४ मा भारतलाई पराजित गर्दै नेपाल फाइनल प्रवेश गरेको छ। नेपालले भारतलाई पेनाल्टी सुटआउटमा ४–० ले हराएको हो।

त्यसअघि १–१ को बराबरी भएपछि खेल पेनाल्टी सुटआउटमा गएको थियो।

बराबरीपछी टाइब्रेकरमा पुगेको खेलमा भारतका तर्फबाट पहिलो प्रहार गरेकी कप्तान आशालता देवीलाई नेपाली किपर अन्जनाले रोकेकी थिइन्। साम्बाले नेपालको पहिलो पेनाल्टीमा गोल गर्दै नेपाललाई अग्रतामा पुर्याइन् । भारतकी मनिषाले दोस्रो प्रहारमा गोल गरिन् । नेपालकी गीता रानाले गोल गर्दै २-१ को अग्रतामा पुर्याइन् । त्यसपछि पुरुषोत्तम शिरोभ्करले गोल गर्दै खेल २-२ मा ल्याइन् । सविताले तेस्रो प्रहारमा गोल गर्दै खेलमा नेपालको अग्रता कायम राखिन् ।

भारतको चौथो प्रहार गरेकी रन्जना चानुको पेनाल्टीलाई अन्जनाले रोकिन्। त्यसपछि अमिषा कार्कीले गोल गर्दै नेपाललाई जित दिलाइन्।

आज खेल निकै तनावग्रस्त बन्यो। गोल विवादले एक घण्टा ६ मिनेट खेल अवरुद्ध भएको थियो। विवाद समाधानपछि खेल सुरु भएको दोस्रो मिनेटमै नेपालबाट सावित्रा भण्डारीले गोल गरेकी थिइन्।

त्यसअघि खेलको ७१औँ मिनेटमा नेपालले ‘विवादित गोल’ गरेको थियो। तर, त्यो गोलले मान्यता नपाएपछि खेल अवरुद्ध भएको थियो।

दोस्रो हाफको २६औँ मिनेटमा भारतले गोल गरेको थियो। तर, विपक्षी खेलाडी खुसियाली मनाउँदै गर्दा रेफ्रीको विवादित ‘प्ले अन ह्विसिल’पछि नेपालले गोल गरेको थियो।

तर, रेफ्रीले त्यसलाई मान्यता नदिँदा नेपालको ‘बराबरी गोल’ खोसियो। यसबाट आक्रोशित दर्शकले बोतल प्रहार गर्दा खेल पुनः रोकिएको थियो। त्यतिबेला नेपालकी प्रीति राईले गोल गरेकी थिइन्।

त्यसअघि दोस्रो हाफको सुरुवातमै नेपालकी रेखा पौडेलले रातो कार्ड पाएकी थिइन्। दोहोरो पहेँलो कार्डपछि रेखा रातो कार्ड पाउँदै मैदानबाट बाहिरिएका थिइन्।

रेफ्रीले रेखालाई रातो कार्ड देखाएपछि स्थिति तनावग्रस्त बनेको थियो। सुरक्षा चुनौती बढेपछि खेल झन्डै १५ मिनेट रोकिएको थियो।

नेपालले उपाधिका लागि बंगलादेशसँग खेल्ने छ।