किट विश्वविद्यालयका शिक्षक र कर्मचारी बर्खास्त गर्न परराष्ट्रमन्त्री राणाको माग

नेपाली विद्यार्थीहरूमाथि दुर्व्यवहार गर्ने ओडिसास्थित कालिंगा इन्स्टिच्युट अफ इन्डस्ट्रियल टेक्नोलोजी (केआईआईटी) का शिक्षक तथा कर्मचारीहरूलाई स्थायी रूपमा नै बर्खास्त गर्न परराष्ट्रमन्त्री आर्जु राणा देउवाले माग गरेकी छन्।

ओडिशाका मुख्यमन्त्री मोहन चरण माझीसँग टेलिफोनमार्फत यस्तो माग गरेकी हुन्। ती कर्मचारीलाई अस्थायी नभई स्थायी रूपमा नै हटाउन ओडिशा सरकारसँग मन्त्री राणाले माग गरेकी हुन्। सामाजिक सञ्जाल एक्समा एक पोस्ट लेख्दै मन्त्री राणाले किट विश्वविद्यालयमा प्रकृति लम्सालको मृत्युपछि विकसित घटनाक्रमबारे आफूले त्यहाँका मुख्यमन्त्रीसँग कुराकानी गरेको जानकारी गराएकी हुन्।

उनले लेखेकी छन्, ‘मैले उहाँसँग लम्सालको मृत्युको निष्पक्ष अनुसन्धान र दोषीमाथि कानुनी कारबाहीका साथै त्यहाँ अध्ययनरत नेपाली विद्यार्थीहरूको सुरक्षित वातावरणमा पठनपाठनको व्यवस्थाका लागि आग्रह गरेकी छु।’

यस विषयमा कलेजको पनि समिति बनेको र त्यहाँ नेपाली राजदूतावास नयाँ दिल्लीबाट कूटनीतिक कर्मचारी खटिएकोपनि उनले त्यहाँ उल्लेख गरेकी छन्। उनले ती कर्मचारीसँग समन्वयका लागि पनि आफूले मुख्यमन्त्री माझीसँग आग्रह गरेको लेखेकी हुन्।

जवाफमा मुख्यमन्त्रीले यस घटनालाई ओडिशा राज्यले नै गम्भीर रूपमा लिएको र प्रकृतिलाई न्याय र दोषीमाथि कारबाहीका लागि उच्चस्तरीय छानबिन समिति गठन गरेर काम सुरु गरिएको जानकारी दिएको उनले जानकारी गराएकी छन्।

ओडिशा सरकारका तर्फबाट आवश्यक सबै सहयोग उपलब्ध गराउने आश्वासन पाएको पनि उनले जनाएकी छन्।