पशुपतिनाथ क्षेत्रमा मासु र मदिरा निषेध

काठमाडौँ जिल्ला प्रशासन कार्यालयले पशुपतिनाथ क्षेत्र र त्यस वरपरका क्षेत्रमा मासु, मदिरा र नसालु पदार्थ सेवन तथा बिक्री वितरण निषेध गरेको छ।

महाशिवरात्रि पर्व, २०८१ लाई अनुशासित, मर्यादित तथा व्यवस्थित बनाउन भन्दै काठमाडौँका प्रमुख जिल्ला अधिकारी ऋषिराम तिवारीले मासु, मदिरा तथा नसालु पदार्थहरू उत्पादन, बेचबिखन, ओसारपसार, भण्डारण र सेवन गर्न नपाउने निषेध गरिएको सूचना जारी गरेका हुन्।

यस सूचनाको उल्लंघन गरेमा कानुनी कारबाही गर्ने चेतावनी तिवारीले दिएका छन्। सोमबारदेखि बिहीवारसम्म ४ दिन यस्ता पदार्थ पशुपति क्षेत्रमा निषेध गरिएको हो।

‘यही मिति २०८१ /११ /१२ गतेदेखि २०८१/११/१५ गतेसम्मका लागि देहायका चार किल्लाभित्र कसैले पनि मासु, मदिरा तथा नसालु पदार्थहरू उत्पादन, बेचबिखन, ओसारपसार, भण्डारण र सेवन गर्नसमेत नपाउने गरी स्थानीय प्रशासन ऐन, २०२८ को दफा ६ को उपदफा (३) बमोजिम पूर्णरूपमा रोक लगाइएको छ,’ तिवारीले आइतबार जारी गरेको सूचनामा भनिएको छ, ‘कोही कसैले यो सूचनाको बर्खिलाप हुने गरी कुनै काम गरेमा प्रचलित कानून बमोजिम कारबाही भइजाने व्यहोरा समेत यसै सूचनाद्वारा जानकारी गराइएको छ।’

गौशाला-मित्रपार्क सडकदेखि पूर्व, पशुपति क्षेत्रको पूर्व सिमानादेखि पश्चिम, गौशाला तिलगंगा चक्रपथदेखि उत्तर, मित्रपार्क, उमाकुण्ड, गौरीघाट हुँदै गुह्येश्वरीदेखि दक्षिणभित्रका क्षेत्रमा मासु, मदिरा र नसालु पदार्थको कारोबार गर्न नपाइने सूचनामा उल्लेख छ।