शिवरात्रिमा साधुसन्तलाई खानेबस्ने सुविधा र दक्षिणा, संकल्प गर्दै राष्ट्रपति

गुठी संस्थानले महाशिवरात्रिमा पशुपतिनाथको दर्शनका लागि आउने साधुसन्तलाई सोमबारदेखि आवासीय सुविधा दिने भएको छ।

सोमबार बिहानदेखि पशुपति क्षेत्रमा आएका साधुसन्तको गणना सुरु गर्ने संस्थानअन्तर्गतको काठमाडौँ शाखाका प्रमुख वैकुण्ठ रेग्मीले जानकारी दिए। महाशिवरात्रिमा आउने साधुसन्तका लागि फागुन कृष्ण एकादशीदेखि संस्थानले बस्ने, खाने र धुनी जगाउन दाउराको व्यवस्था गर्ने परम्परा छ। यसरी राखिएकालाई संस्थानले फागुन कृष्ण औँसीका दिन दक्षिणासहित बिदाइ गर्ने परम्परा पनि छ। महाशिवरात्रिका लागि भारतबाट हजारौँ साधुसन्त आउने गरेका छन्।

महाशिवरात्रिमा पशुपतिनाथ आउने साधुसन्तका लागि बस्ने, खाने र धुनी जगाउन दाउरा दिन फागुन कृष्ण एकादशीका दिन राष्ट्राध्यक्षले सङ्कल्प पूजा गर्ने विधि रहेको छ। सोमबार बिहान १० बजे राष्ट्रपति रामचन्द्र पौडेलले शितलनिवासमा सङ्कल्प पूजा गर्ने कार्यक्रम छ।

सङ्कल्प पूजामा राडी, कमण्डलु, चमर, खाद्य सामग्रीलगायत साधु सन्तलाई दिइने चीजबीज राखिने संस्थानले जनाएको छ। यस वर्ष भारतको प्रयागराजमा जारी कुम्भ मेलाका कारण त्यता स्नान गरी भक्तजन यता पनि बढी नै आउने अनुमान गरिएको छ।