प्रकृति लम्सालको शव आज नेपाल ल्याइँदै

भारतको उडिसामा आत्महत्या गरेकी नेपाली विद्यार्थी प्रकृति लम्सालको शव आज नेपाल ल्याइने भएको छ।

कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) मृत भेटिएकी लम्सालको शव नेपाल ल्याउन भारतस्थित नेपाली दूतावासको सहयोगमा स्थानीय प्रशासन, सुरक्षाकर्मी र कलेजसँग समन्वय भइरहेको उनका आफन्तले जनाएका छन्।

प्रकृतिको शंकास्पद मृत्यु भएको खबर आएपछि बुबा सुनिल लम्साल ओडिसा पुगेका छन्। उनले मंगलबार प्रहरी अधिकारीहरूसँग भेटेर न्याय पाउनुपर्ने बताएका थिए ।

गत आइतबार अपराह्न २० वर्षीय प्रकृति होस्टलको कोठामा मृत अवस्थामा फेला परेकी थिइन् । साँझबाटै विद्यार्थीहरूले न्याय माग्दै कलेजलगायत भारतका विभिन्न स्थानमा प्रदर्शन गरेका थिए।

चर्को आलोचना भएपछि भने विश्वविद्यालय प्रशासनले केही कर्मचारीलाई बर्खास्त गरी त्यहाँ रहेका सुरक्षा गार्डहरूमाथि फौजदारी मुद्दा लगाएको छ। विश्वविद्यालय र प्राध्यापक मन्जुशा पाण्डेले पनि माफी मागेकी छन् ।

नेपालस्थित भारतीय दूतावासले घटनाको अनुसन्धान भइरहेको जनाएको छ भने नेपालको परराष्ट्र मन्त्रालयले पनि घटनाबारे अनुसन्धान भएको र दोषीहरूलाई कानुनी कारबाही गर्न भारत तयार रहेको जानकारी गराइसकेको छ।