‘प्रिय एलीना,तिमीले आफूलाई गुमाउन चाहेनौ,म तिम्रो साहसलाई सलाम गर्छु’

अभिनेत्री ऋचा शर्माले गायिका एलिना चौहान सहासी महिला भएको भन्दै उनको आँटलाई सलाम गरेकी छन्।

सामाजिक सञ्जाल टिकटकमा उनले एक भिडियो पोस्ट गरेकी छिन्। उक्त भिडियोमा ऋ‍चाले एलिनाको वैवाहिक सम्बन्ध र उनको संगीतको तारिफ गरेकी छिन्।

जहाँ उनले लेखेकी छिन् – प्रिय एलिना साँच्चै, संगीत तिमीभित्र बाँचिरहेको थियो, तिमी त्यसैमा हराउन चाहन्थ्यौ। कसैले तिम्रो पखेटा काटेर घरको सानो खाँबोमा बाँध्न खोज्यो, तर तिमी उड्न चाहन्थ्यौ। विवाह एउटा सम्बन्ध हो, बाँधिनु होइन। जब सम्बन्धले तिमीलाई साँघुरो बनाउँछ, तिम्रो सपनालाई थिच्छ, तब त्यसलाई निरन्तरता दिनुको कुनै अर्थ हुँदैन। तिम्रो आँटलाई म सलाम गर्छु।

एलिना चौहान स्टेजमा गाउँदै गर्दा भक्कानिएको एक भिडियो क्लिप भाइरल भएपछि ऋचाको यस्तो अभिव्यक्ति आएको हो। उनले उक्त भिडियो फेसबुकमा पनि राखेकी छन्।

उनले लेखेकी छन् –

प्रिय एलीना,तिमीले आफ्नो विवाह एक वर्षमै टुंग्याउने निर्णय लियौ र मलाई थाहा छ, यो सजिलो निर्णय थिएन। समाजले प्रश्न गर्‍यो होला, परिवारले चिन्ता व्यक्त गर्‍यो होला, र धेरैले तिम्रो निर्णय बुझ्न सकेन होला। तर म बुझ्छु किनभने तिमीले आफूलाई गुमाउन चाहेनौ। साँच्चै, संगीत तिमीभित्र बाँचिरहेको थियो, तिमी त्यसैमा हराउन चाहन्थ्यौ। कसैले तिम्रो पखेटा काटेर घरको सानो खाँबोमा बाँध्न खोज्यो, तर तिमी उड्न चाहन्थ्यौ। विवाह एउटा सम्बन्ध हो, बाँधिनु होइन। जब सम्बन्धले तिमीलाई साँघुरो बनाउँछ, तिम्रो सपनालाई थिच्छ, तब त्यसलाई निरन्तरता दिनुको कुनै अर्थ हुँदैन। तिम्रो आँटलाई म सलाम गर्छु। धेरै महिलाहरू समाजको डरले आफूलाई बिर्सेर अरूको चाहनामा बाँच्न बाध्य हुन्छन्। तर तिमीले आफूलाई चुनेउ, आफ्ना सपनालाई चुनेउ। संगीत तिम्रो आत्मा हो, र तिमीले त्यसैलाई अँगाल्यौ।तिमीले जस्तो निर्णय लियौ, त्यसले तिमीलाई अझ बलियो बनाओस्। तिम्रो स्वर, तिम्रो संगीत संसारभरि गुञ्जिरहोस्। यदि कहिल्यै थाक्यौ भने, सम्झनू तिमी एक यस्ती साहसी मान्छे हौ जसले परम्परागत सिमानाहरू तोडेर आफ्नो बाटो आफैं कोरिन्। तिम्रो साथमा। ऋचा शर्मा