झापाको शिवसताक्षी नगरपालिकामा भएको घटनालाई ‘अमला काण्ड’ भन्दै अतिरञ्जित ढंगले प्रस्तुत गर्ने ३८ वटा युट्युब च्यानलविरुद्ध प्रेस काउन्सिल नेपालले कारबाही प्रक्रिया अघि बढाएको छ।
२१ वर्षीया महिलाले बच्चा पाएको घटनामा बयोवृद्धलाई जोड्दै पुष्टि भइनसकेको कुरालाई आफूखुसी सामाग्री बनाएर सम्प्रेषण गर्ने युट्युबरहरू कारबाहीमा परेका हुन्।
पीडित युवती, आरोपित जेष्ठ नागरिक , शिशु र पीडित परिवारको भिडियो तथा तस्बिर अमर्यादित रुपमा सम्प्रेषण गरेको काउन्सिलले जनाएको छ।
उक्त प्रकरणमा ती वृद्धको संलग्नता भएको कुरा पुष्टि नभइसकेको अवस्थामा वैयक्तिक गोपनीयता नराखी बदनाम गराएको आरोपमा काउन्सिलले ती युट्युबरलाई कारबाही चलाएको हो।
काउन्सिलले पछिल्लो समय विभिन्न युट्युब च्यानल र फेसबुक पेजमार्फत सत्यतथ्य पुष्टि नगरी सनसनीपूर्ण समाचार सम्प्रेषण भइरहेको जनाएको छ।
पीडित युवती, आरोपित जेष्ठ नागरिक, शिशु र पीडित परिवारका भिडियो तथा तस्बिर सार्वजनिक गर्दै अमर्यादित प्रश्नहरू सोधिएको, संवेदनहीन बहसलाई प्राथमिकता दिँदै भ्युअर बढाउने उद्देश्यले चरित्रहत्या गर्ने सामग्री सम्प्रेषण गरिएको काउन्सिलको ठहर छ।
पत्रकार आचारसंहिता, महिला उत्तरदायी सञ्चार निर्देशिका, जेष्ठ नागरिकमैत्री सञ्चार निर्देशिका र वैयक्तिक गोपनीयतासम्बन्धी ऐनको उल्लङ्घन गर्ने यस्ता च्यानलहरूमाथि कारबाही अघि बढाइएको काउन्सिलले जनाएको छ।
साथै, मिडियाको आवरणमा चलेका तर दर्ता नभएका युट्युब च्यानललाई साइबर ब्युरोमार्फत कानुनी प्रक्रिया अघि बढाइएको जानकारी दिएको छ।
काउन्सिलले पत्रकारिताका मूल्य मान्यता विपरीत समाजमा घृणा, उत्तेजना र अफवाह फैलाउने सामग्री तत्काल हटाउन आग्रह गरेको छ। साथै, गैरपेशागत तथा गैरकानुनी गतिविधि नगर्न चेतावनी दिँदै जिम्मेवार पत्रकारितामा ध्यान दिन सबै सञ्चार माध्यमलाई अनुरोध गरेको छ।
सञ्चारमाध्यमहरूको नियामक प्रेस काउन्सिल नेपालले बुधबार विज्ञप्ति जारी गर्दै ३८ वटा युट्युब च्यानललाई कारबाही गरेको जनाएको छ।
काउन्सिलले कारबाहीमा परेका युट्युब च्यानलको नाम भने सार्वजनिक गरेको छैन ।
यो खबर पढेर तपाईलाई कस्तो महसुस भयो ?
खुशी
०%
०%
अचम्म
०%
०%
उत्साहित
०%
०%
दुखी
०%
०%
आक्रोशित
०%
०%
