चलचित्र ‘केटी हराएको सूचना’ आजदेखि प्रदर्शनमा

चलचित्र ‘केटी हराएको सूचना’ आजदेखि देशभरका सिनेमा हलमा प्रदर्शनमा आएको छ।

चलचित्रको कथा मधेशी समुदायकी एक केटी र पहाडी समुदायका केटाबीचको प्रेम सम्बन्धमा आधारित छ।

दीपेन्द्र गौचनको लेखन र निर्देशन रहेको यो चलचित्रले फरक संस्कृतिमा आधारित प्रेमकथा र त्यसले निम्त्याउने सामाजिक चुनौतीलाई उजागर गरेको छ।

चलचित्रमा नाजिर हुसेनको मुख्य भूमिकासँग सृष्टि श्रेष्ठ, सञ्जय गुप्ता, रामनारायण ठाकुर, मदन ठाकुर, अर्जुन पोखरेललगायतको अभिनय रहेको छ । अमितेष शाहको विशेष भूमिका समेत रहेको यस चलचित्रमा कलाकारहरूको उत्कृष्ट अभिनयले दर्शकको मन जित्ने विश्वास निर्माण टिमले लिएको छ ।

चलचित्रले प्रेम, सामाजिक अन्याय, सांस्कृतिक विभाजन, र सहअस्तित्वको सन्देशलाई कलात्मक रूपमा समेटेको छ । यसले समाजमा जातीय तथा सांस्कृतिक विभाजनले प्रेम सम्बन्धमा ल्याउन सक्ने चुनौतीलाई देखाउँदै सकारात्मक संवादको शुरूवात गर्ने अपेक्षा गरिएको छ।