प्रेमविवाहको विषयमा नवलपरासीमा झडप

नवलपरासी पश्चिमको पाल्हीनन्दन गाउँपालिकास्थित बेलासपुरमा दुई समूहबीच झडप भएको छ।

प्रेमविवाहको विषयमा बेलासपुर र प्रसौनीका स्थानीयबीच झडप भएको हो। केटा पक्षकाले केटी पक्षका घरमा आएर आगजनीको प्रयास गरेपछि झडप भएको स्थानीयले बताएका छन्। झडप नियन्त्रणका लागि प्रहरीले ३ राउन्ड हवाई फायर गरेको थियो। ७ राउन्ड अश्रु ग्यासको प्रयोग गरेको थियो।

प्रदर्शनकारीले प्रहरीको एउटा गाडीमा पनि आगजनी गरेका छन्। प्रहरीको गाडीमा आगजनी भएको छ। झडप नियन्त्रणमा लिने क्रममा ५ जना स्थानीय , ११ जना जनपथ र ४ जना सशस्त्र प्रहरी घाइते भएका छन्।

तीन महिनाअघि भागी विवाह भएको विषयमा केटी पक्षले केटाका बुवालाई कुटपिट गरेका थिए। यो माघको घटना थियो। सोही घटनाका कारण उनीहरूबीच द्वन्द्व बढेको थियो। त्यतिबेला वडा कार्यालयको पहलमा जिल्ला प्रहरी कार्यालयमा मिलापत्र पनि भएको थियो।

सोमबार राति फेरि केटी पक्षका आफन्तले केटाका भाइलाई बाटोमै रोकेर कुटेका थिए। उनको पृथ्वीचन्द्र अस्पताल परासीमा उपचार भइरहेको छ।

घटनापछि गाउँलेहरू दुई पक्षमा विभाजित भइ कुटपिटमा उत्रिएका थिए। प्रहरीले बल प्रयोग गरेर अहिले स्थिति नियन्त्रणमा लिएको छ। प्रमुख जिल्ला अधिकारी समेतको उपस्थितिमा छलफल भइरहेको वडाध्यक्ष गोधन प्रसाद हरिजनले जानकारी दिए।