‘नो केबुलकार’मा बल प्रयोग गरे आन्दोलनकारीका पक्षमा उभिन्छौँ : प्रचण्ड

नेकपा माओवादी केन्द्रका अध्यक्ष पुष्पकमल दाहाल प्रचण्डले पाथीभरा केबुलकार निर्माण विवादमा सरकारले बल प्रयोग गरे आफूहरू आन्दोलनकारीको पक्षमा उभिने चेतावनी दिएका छन्।

माओवादी तराई मधेस जागरण अभियान अन्तर्गत मोरङको रमाइलो बजारमा आयोजित सभालाई सम्बोधन गर्दै उनले बताएका हुन् ।

‘झन् बल प्रयोग गरेर आन्दोलनकारीको टाउको फुटाएर। विचरा प्रहरी नचाहँदा नचाहँदै पनि सरकारले भनेको मान्नुपर्ने। थुप्रै प्रहरी पनि घाइते हुने जुन परिस्थिति सरकारले बनाएको छ,’ प्रचण्डले अघि भने, ‘फेरि पनि त्यसलाई रोकेर वार्ता र संवादबाट प्रक्रिया अघि बढाइयोस्। यदि रोकिएन भने माओवादी आन्दोलनकारीको पक्षमा उभिनेछ र देशव्यापी आन्दोलनतिर जानेछ।’

पाथीभराको मुद्दा एउटा सांस्कृतिक र भावनात्मक ऐतिहासिक मुद्दा भएको बताउँदै प्रचण्डले यसमा बल प्रयोग गर्ने दुस्साहस नगर्न सरकारलाई आग्रह गरे।

‘यसलाई बल प्रयोगद्वारा हल गर्ने दुस्साहस सरकारले नगरोस्। यदि बल प्रयोग गरेर भावनाको मुद्दालाई इतिहास र पौराणिकताको विषयलाई हल गर्न खोज्यो भने त्यो दुर्भाग्य हुन्छ भनेको थिएँ,’ प्रचण्डले भने, ‘एउटा खबरदारी सभामा बल प्रयोग नगर्नू। यसलाई समझदारीको माध्यमबाट ‘विन विन’को बाटो खोज्नुपर्छ। सबैलाई मान्य हुने समझदारीको बाटो खोज्नुपर्छ।’