सांसद पद निलम्बनको निर्णय फिर्ता लिन माग गर्दै रविको निवेदन

राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नो सांसद पद निलम्बनको निर्णय फिर्ता लिन माग गर्दै सभामुख देवराज घिमिरेलाई निवेदन गरेको छन्।

सिंहदवारमा भएको भेटमा उनले आफूलाई निलम्बन गर्ने प्रक्रिया नमिलेको भन्दै फुकुवाको माग गरेका हुन्। सभामुखको कार्यकक्षमा रास्वापाका सांसदलाई लिएर रवि पुगेका थिए।‘सम्पत्ति शुद्धीकरण निवारण ऐन, २०६४ को दफा २७ बमोजिम आफूलाई गरिएको निलम्बल कानुनसम्मत नभएको रविको जिकिर छ।

जवाफमा सभामुख घिमिरेले आफूले विद्यमान कानुन, संसद नियमावली र अभ्यास बमोजिम निलम्बनको निर्णय गरेको बताएका थिए।‘कसैको दबाब, प्रभाव, पूर्वाग्रह र पक्षधरताका आधारमा होइन। हिजो यस पदमा अरु कोही थियो। आज म छु। भोलि अरु कोही हुन सक्छ। तर पदमा रहँदा कानूनको परिपालना गर्नु मेरो दायित्व हो,’ घिमिरेले लामिछानेलाई भने, ‘तपाईंहरूले निवेदन दिनुभएको छ। यो छलफल र परामर्शको विषय हो। आजलाई समय भएन। हामी संसद सुरु हुने अन्तिम समयमा छौँ।’

कास्की जिल्ला अदालतमा सहकारी ठगी, संगठित अपराध र सम्पत्ति शुद्धीकरणको मुद्दा दर्ता भएपछि लामिछानेको सांसद पद पुस ७ गतेदेखि स्वत: निलम्बनमा परेको थियो। त्यसको सूचना संसद सचिवालयले माघ ८ गते प्रकाशित गरेको थियो।