फ्रेन्डशिप कपको फाइनलमा नेपाल र गुजरात भिड्दै

गुजरातको वापीमा जारी एसएमएस फ्रेन्डशिप कपको फाइनलमा नेपाली राष्ट्रिय क्रिकेट टोलीले आज गुजरातको सामना गर्दैछ । नेपाल र गुजरात बीचको फाइनल खेल दिनको १ः १५ बजे सुरु हुँदैछ ।

नेपालले लिग चरणमा ४ मध्य ३ खेल जित्दै फाइनल प्रवेश गरेको हो । अन्तिम खेलमा बरोडा विरुद्ध हार बेहोर्नु अघि नै नेपालले फाइनलमा आफ्नो स्थान बनाइसकेको थियो । गुजरात भने ४ खेलमा २ जित सहित फाइनल प्रवेश गरेको हो । आजको खेल ओमानमा हुने प्रिमियर कप अघि नेपालका लागि अन्तिम खेल हुनेछ ।

नेपालले पहिलो खेलमा गुजरातलाई नै ८ विकेटले हराएको थियो । नेपाली बलरले उत्कृष्ट प्रदर्शन गर्दा गुजरात ९८ रनमा अल आउट भएको थियो । दोस्रो खेलमा गुजरातले बरोडालाई ५ विकेटले पराजित गरेको थियो । तेस्रो खेलमा नेपाल २७ रनले विजयी भएको थियो ।
नेपाल एसीसी मेन्स प्रिमियर कप र टी२० विश्वकपको तयारीका लागि भारत भ्रमणमा गएको हो ।