मुगुमा जिप दुर्घटना हुँदा २ जनाको मृत्यु

मुगुमा जिप दुर्घटना हुँदा २ जनाको मृत्यु भएको छ भने ४ जना घाइते भएका छन् ।
कर्णाली प्रदेश ०२ ००१ ज ००५९ नम्बरको जिप मुगुको गमगढीबाट सोरू गाउँपालिका तारापानीतर्फ जाँदै गर्दा सोरूको कच्चे भन्ने ठाउँमा दुर्घटना भएको हो ।
दुर्घटनामा परेर सोरू गाउँपालिका–७ का जिप चालक कविराज नेपाली र सोरू–२ की २५ वर्षीया कुसुम नेपालीको मृत्यु भएको छ ।
जिल्ला प्रहरी कार्यालय मुगुका प्रमुख डीएसपी वीरेन्द्र थापाका अनुसार घाइते सबैलाई उपचारका लागि जिल्ला अस्पताल पुर्‍याइएको छ । घाइतेमध्ये एक जनाको अवस्था गम्भीर छ । जिपमा ६ जना सवार थिए ।