विमानस्थलमा जाँदा–आउँदा गरिने व्यवहार परिवर्तन हुनुपर्छ – गृहमन्त्री रवि लामिछानेले

काठमाडौं – उपप्रधान तथा गृहमन्त्री रवि लामिछानेले श्रमिकलाई विमानस्थलमा जाँदा–आउँदा गरिने व्यवहार परिवर्तन हुनुपर्ने बताएका छन्। मंगलबार अध्यागमन विभागको निरीक्षणमा गएका लामिछानेले अधिकारीहरूको ब्रिफिङ सुनेपछि अध्यागमनलाई सुधार गर्न निर्देशन पनि दिएका छन् । अध्यागमन विभागका कर्मचारीहरूलाई मंगलबार निर्देशन दिँदै गृहमन्त्री लामिछानेले अध्यागमनले वैदेशिक रोजगारीमा जाने र नेपाल आउनेसँग भद्र व्यवहार गर्न आग्रह गरे। लामिछानेले हिजोका घटनामा कसैलाई दोषारोपण गर्न नचाहने तर भविष्यमा त्यस्ता घटना र प्रवृत्ति दोहोरिनु नहुने बताए ।

‘‘रेमिट्यान्स पठाएर देशको अर्थतन्त्रमा योगदान दिने श्रमिकलाई विमानस्थलमा जाँदा–आउँदा गरिने अमर्यादित र अभद्र व्यवहार नगर्न तथा अनावश्यक दुःख, कष्ट र हैरानी दिने प्रवृत्ति तत्काल सुधार गर्न आग्रह गर्छु’ उनले भने। नेपालको अध्यागमनलाई अन्तर्राष्ट्रिय मापदण्डअनुसार प्रविधिमैत्री बनाउनु पर्नेमा जोड दिँदै लामिछानेले अध्यागमनमा खटिने जनशक्तिलाई पर्याप्त तालिमको व्यवस्था गर्न आग्रह गरे।